Ինֆորմացիայի ազատության կենտրոնը հրապարակել է 2025 թվականի իր ֆինանսական տարեկան հաշվետվությունները: Համաձայն հաշվետվության ամփոփաթերթի՝ 2025 թվականին Ինֆորմացիայի ազատության կենտրոնը պետությանը վճարել է 670929.25 ՀՀ դրամ հարկ: 

ԻԱԿ տարեկան ֆինանսական հաշվետվության ամփոփում 2025

2025 թվականի ընթացքում Ինֆորմացիայի ազատության կենտրոնի գործունեության արդյունքները

Տեղեկատվության ազատություն

• Տեղեկություն ստանալու ավելի քան 300 հարցում է ուղարկվել։ Դրանց միջոցով հավաքագրված տվյալներն օգտագործվել են շահերի պաշտպանության, իրավական աջակցության և հետազոտական նպատակներով։
• ԻԱԿ-ը 100-ից ավելի լրագրողի և քաղաքացու աջակցել է տեղեկություն ստանալու գործընթացում՝ տրամադրելով խորհրդատվություն և աջակցություն հարցումներ մշակելու, ուղարկելու գործընթացում և անհրաժեշտության դեպքում նաև բողոքարկմանն առնչվող հարցերում։
• Պետական կառավարման մարմինների ՏԱ շուրջ 40 ներկայացուցիչների ներկայացվել է ԻԱԿ-ի մշակած Տեղեկատվության ազատության ինքնագնահատման համակարգը և ՏԱ վիճակագրության միասնական ձևաչափը։ Աշխատանքային քննարկման շրջանակում պետական կառույցների ՏԱ պատասխանատուներն ու հաղորդակցման ստորաբաժանումների ներկայացուցիչները ստացել են ինքնագնահատման համակարգի գործարկման և վիճակագրության մշակման և հրապարակմանն առնչվող գիտելիք և հմտություններ։ Այս համակարգերի լիարժեք ներդումը պետական կառավարման համակարգում կապահովի տեղեկատվության ազատության միասնական դրական պրակտիկայի ձևավորմանը։

Մամուլի պատասխանատվություն և հաշվետվողականություն

• Ինֆորմացիայի ազատության կենտրոնի աջակցությամբ 2025 թվականին հայաստանյան 20 լրատվամիջոց միացել է Լրագրողական վստահության նախաձեռնությանը (JTI)՝ լրացնելով և հրապարակելով թափանցիկության հաշվետվություն։ Լրագրողներ առանց սահմանների միջազգային կազմակերպության և ԻԱԿ համատեղ նախաձեռնությունը դարձավ իրական շրջադարձային կետ հայկական մեդիայի համար։ Կարճ ժամանակահատվածում այն օգնեց տեղական լրատվամիջոցներին գործել թափանցիկ և հաշվետու։ Ներգրավված 20 լրատվամիջոցներն այժմ հրապարակում են իրենց գործունեության արժեքները, քաղաքականությունը և հաշվետվողականության մեխանիզմները։ Այս զարգացումը միայն էթիկական համապատասխանության մասին չէ․ այն վերաբերում է լսարանի վստահության վերականգնմանը և հայկական պատասխանատու լրագրության համար նոր չափանիշի ձևավորմանը։ Journalism Trust Initiative (JTI) համակարգը մշակել է Լրագրողներ առանց սահմանների կազմակերպությունը, որը գործում է հանուն գլոբալ լրագրության ազատության, բազմակարծության և անկախության խթանման։

Շրջանաձև տնտեսության մասին հանրային իրազեկում

• Ինֆորմացիայի ազատության կենտրոնը կազմակերպել է շրջանաձև տնտեսության թեմայով իրազեկման հանդիպումներ ներգրավելով 65 ուսանողի։ Հանդիպումների նպատակն է եղել բարձրացնել շրջանաձև տնտեսության համակարգին առնչվող տարբեր մասնագիտություններ ընտրած ուսանողների՝ ոլորտի վերաբերյալ իրազեկման մակարդակը և տրամադրել գիտելիք, թե ինչ դեր կարող է ունենալ իր մասնագիտական գործունեությունը ոլորտի զարգացման համատեքստում։
• ABN Media հայկական բիզնես ուղղվածությամբ լրատվական-վերլուծական հեռուստաընկերության հետ համագործակցությամբ նկարահանվել է շրջանաձև տնտեսության մասին պատմող տեսաֆիլմ և իրազեկող տասը կարճ տեսանյութ՝ շրջանաձև տնտեսության վերաբերյալ տարածված հարցերին տրամադրելով պարզ և հասկանալի պատասխաններ։
• Ինֆորմացիայի ազատության կենտրոնը մշակել և հրապարակել է շրջանաձև տնտեսության լուսաբանման «Շրջանաձև տնտեսություն․ ինչպե՞ս և ինչո՞ւ լուսաբանել» ուղեցույց լրագրողների և լրագրության ոլորտում աշխատող ուսուցանողների համար։
• ԻԱԿ-ը մշակել և հրապարակել է նաև ՇՏ թեման տարբեր դիսցիպլիններում ինտեգրելու հնարավորությունների վերաբերյալ խորհրդատվական զեկույց, որտեղ ներկայացվում են հայաստանյան բուհերում ՇՏ-ի ներդրման ընթացիկ իրավիճակը, առկա մեխանիզմները և առաջարկում ոլորտային զարգացման խորհրդատվականներ և գործողությունների ճանապարհային քարտեզ՝ Շրջանաձև տնտեսության ուսուցման ինտեգրումը հայկական բուհերի կրթական ծրագրերում։

Հետազոտություններ և ուղեցույցներ

• Պետական մարմինների առցանց ծառայությունների մատուցման հարթակների գնահատում – 2025 թվականի դեկտեմբերին ԻԱԿ-ն իրականացրել է պետական մարմինների առցանց ծառայությունների մատուցման e-draft.am, e-request.am և hartak.am հարթակների գնահատում և հրապարակել համապարփակ երկլեզու զեկույց։ Հետազոտության շրջանակում ԻԱԿ-ը վերլուծել և բացահայտել է թվային հարթակների համակարգային խնդիրները, որոնք խոչընդոտում են դրանց լիարժեք և մասնակցային օգտագործումը քաղաքացիների կողմից՝ միաժամանակ գնահատելով դրանց համապատասխանությունը թվային ծառայությունների նախագծման ստանդարտներին, հանրային կառավարման թափանցիկության սկզբունքներին և օգտատիրոջ կարիքներին:
• ՏԱ անկախ լիազոր մարմնի/հանձնակատարի ինստիտուտի ներդրումը Հայաստանում – ԻԱԿ-ի այս հետազոտության շրջանակում անդրադարձ է արվում տեղեկատվության ազատության անկախ լիազոր մարմնի ստեղծման անհրաժեշտությանը Հայաստանի ստանձնած միջազգային հանձնառությունների համատեքստում՝ ներկայացնելով տարբեր երկրներում գործող անկախ լիազոր մարմինների մոդելները, դրանց գործառույթների ամփոփ նկարագիրը, ինչպես նաև առաջարկներ՝ Հայաստանում ՏԱ անկախ լիազոր մարմնի ստեղծմանն աջակցելու նպատակով։
• Իրական շահառուների թափանցիկության ներկա իրավիճակը և զարգացման հեռանկարները Հայաստանում – ԻԱԿ-ն ամփոփել է Հայաստանում իրական շահառուների թափանցիկությանն ուղղված բարեփոխումները: Ամփոփ վերլուծությունը ուրվագծում է Հայաստանում իրական շահառուների թափանցիկության ոլորտում բարեփոխումների ներկա իրավիճակը, ընդգծում է հիմնական ձեռքբերումներն ու բացթողումները, ներկայացնում է հետագա բարելավումների վերաբերյալ առաջարկություններ։
• ԻԱԿ-ը հրապարակել է 2024 թ.-ին նախարարին կից հասարակական խորհուրդների գործունեության վերաբերյալ ուսումնասիրության արդյունքները։ Վերլուծությունը ներկայացնում է, թե որքանով են կիրարկվում Կառավարության 2018 թ. դեկտեմբերի 27-ի որոշման պայմանները։
• Պետական դրամաշնորհներով հատկացվող միլիարդավոր դրամների խառնաշփոթը – ԻԱԿ-ը հրապարակել է նաև 2024 թվականի ընթացքում պետական բյուջեից հատկացվող դրամաշնորհների և սուբսիդիաների մասին ամփոփագիրը՝ ներկայացնելով Վարչապետի աշխատակազմի և 12 նախարարությունների կողմից տրամադրված և բաց աղբյուրներում հասանելի տվյալները։

Միջազգային համագործակցություն

• ԻԱԿ ծրագրերի համակարգող, ԲԿԳ բազմաշահառու խմբի անդամ Լիանա Դոյդոյանը փետրվարի 5-7-ը Ֆիլիպինների մայրաքաղաք Մանիլայում կայացած Բաց կառավարման գործընկերության տարածաշրջանային հանդիպմանը որպես խոսնակ ներկայացրել է մեդիա և մարդու իրավունքների պաշտպանության խնդիրները Հայաստանում՝ հիմնական շեշտը դնելով տեղեկատվության մատչելիության, թափանցիկության հարցերի և լրատվամիջոցների դերի վրա:
• Մարտի 10-ին Եվրոպայում անվտանգության և համագործակցության կազմակերպության ու Տեղեկատվության և ժողովրդավարության ֆորումի համագործակցությամբ կազմակերպված քննարկմանը ԻԱԿ նախագահ Շուշան Դոյդոյանն անդրադարձել է սոցիալական հարթակներում լրագրողների անվտանգությանը։
• Հուլիսի 1-4, Լիտվայում և Լատվիայում կայացած ԲԿԳ Թափանցիկություն. փորձի փոխանակման ծրագրին ԻԱԿ ծրագրերի համակարգող Լիանա Դոյդոյանը ներկայացրել է հայաստանյան փորձը տեղեկատվության ազատության ոլորտում, կոռուպցիայի կանխարգելմանն ուղղված ջանքերը և խնդիրները:
• Սեպտեմբերի 23-ին ԻԱԿ նախագահ Շուշան Դոյդոյանը մասնակցել է «Կոռուպցիայի դեմ պայքարի» ՄԱԿ կոնվենցիայի (UNCAC) տարածաշրջանային հանդիպմանը։ Նա Հայաստանի փորձի օրինակով ներկայացրել է տեղեկությունների պրոակտիվ հրապարակումների զարգացման հնարավորությունները։
• Ինֆորմացիայի ազատության կենտրոնի նախագահ Շուշան Դոյդոյանը ելույթով հանդես է եկել հոկտեմբերի 7-9-ին Իսպանիայում անցկացվող Բաց կառավարման գործընկերության (OGP) 2025 թ. գլոբալ գագաթնաժողովում։ Իր ելույթում ԻԱԿ նախագահը ներկայացրել է պրոակտիվ հրապարակայնության դերը կոռուպցիայի դեմ պայքարի, մարդու իրավունքների պաշտպանության և կառավարման թափանցիկության ապահովման գործում՝ անդրադառնալով Հայաստանի փորձին։
• Ինֆորմացիայի ազատության կենտրոնի նախագահ Շուշան Դոյդոյանը նոյեմբերի 17–18-ին մասնակցել է Երևանում կայացած Opening Extractives կազմակերպության և Արդյունահանող ճյուղերի թափանցիկության նախաձեռնության (EITI) համատեղ միջազգային աշխատաժողովին։ Շուշան Դոյդոյանը ներկայացրել է Հայաստանի փորձը իրական շահառուների թափանցիկության ոլորտում՝ անդրադառնալով բարեփոխումների ներկա վիճակին, առաջացած խնդիրներին և դրանց հաղթահարման ուղղություններով իրականացվող քայլերին։