ԻԱԿ մշակած տեղեկատվության ազատության ինքնագնահատման համակարգը ներդրվել է Վարչապետի աշխատակազմում, Աշխատանքի և սոցիալական հարցերի և Էկոնոմիկայի նախարարություններում։ Համակարգը պետական մարմնին հնարավորություն է տալիս գնահատելու տեղեկատվության ազատության իրականացման գործընթացն իրենց կառույցում։ Ինքնագնահատման համակարգի արդյունավետության մասին անդրադարձել է նաև ՅՈւՆԵՍԿՕ-ն իր զեկույցում։ Ընդգծելով համակարգի ներդրման գործում ԻԱԿ դերակատարումը՝ զեկույցը նշում է պետական կառույցների թափանցիկության և հաշվետվողականության գնահատման համակարգի ներդրման և պետական կառույցների պրոակտիվ հրապարակայնության կարևորությունը ապատեղեկատվությունը հայտնաբերելու, կանխելու և վերլուծելու գործում։
Ինֆորմացիայի ազատության կենտրոնի առաջարկով ՏԱ ինքնագնահատման համակարգի ներդրման հանձնառությունը ներառվել էր «Բաց կառավարման գործընկերություն» նախաձեռնության հայաստանյան 5-րդ Գործողությունների ծրագրում (2022-2024 թթ.): ԻԱԿ-ի կողմից ինքնագնահատման համակարգի մշակումից հետո այն ներկայացվել էր պետական մարմինների ներկայացուցիչներին։ Զուգահեռաբար, ԻԱԿ-ը հրապարակել էր ՏԱ ինքնագնահատման ուղեցույցը, որի նպատակն է սահմանել այն նվազագույն չափանիշները, որոնց համապատասխանելու միջոցով տեղեկություն տնօրինողը կարող է իրականացնել տեղեկատվության ազատության վիճակի գնահատում։ Ուղեցույցը մասնավորապես ներկայացնում է այն քայլերը, որոնք տեղեկություն տնօրինողը պետք է իրականացնի՝ ՏԱ ոլորտում իր գործունեությունը Տեղեկատվության ազատության մասին ՀՀ օրենսդրությանը և միջազգային չափանիշներին համապատասխանեցնելու համար:
Որպես ինքնագնահատման համակարգի ներդրման պիլոտային մարմիններ ընտրվել էին ՀՀ վարչապետի աշխատակազմը, Աշխատանքի և սոցիալական հարցերի նախարարությունն ու Էկոնոմիկայի նախարարությունը: Առաջին քայլերն իրականացվել են Աշխատանքի և սոցիալական հարցերի նախարարությունում․ ԻԱԿ-ի փորձագետ Գևորգ Հայրապետյանն այցելել է նախարարություն, առանձին աշխատել նախարարության ստորաբաժանումների հետ՝ դրանց օրինակով վերհանելով նախարարության տնօրինության տակ եղած տեղեկությունները, դրանց տնօրինման իրավական հիմքը, կարգավիճակը (արդյոք տեղեկությունը գաղտնի է, թե՝ ոչ), ինչպես նաև կարգավիճակի իրավական հիմքը: Այնուհետև քննարկվել են ինքնագնահատման մեխանիզմի ներդրման արդյունքները:
2024 թվականի դեկտեմբերի դրությամբ ինքնագնահատման համակարգը պիլոտային կարգով հաջողությամբ ներդրվել է ՀՀ վարչապետի աշխատակազմում, Աշխատանքի և սոցիալական հարցերի և Էկոնոմիկայի նախարարություններում: Առաջիկայում համակարգը կներդրվի նաև պետական կառավարման մյուս մարմիններում։ Համակարգի համալիր ներդրումը պետական կառավարման համակարգում հնարավորություն կտա բացահայտել ՏԱ պրոակտիվ և ռեակտիվ խնդիրները, մշակել թիրախային կոնկրետ լուծումներ։ Գործընթացը նաև ուղղակի և անուղղակի ձևով կբարելավի պաշտոնական տեղեկությունների հասանելիությունը։
