«Լրագրողներ առանց սահմանների» կազմակերպության աջակցությամբ իրականացվող ծրագրի շնորհիվ զարգացել են արցախցի լրագրողների մասնագիտական կարողությունները։ Արցախցի լրագրողների գնահատմամբ՝ ծրագիրը նպաստել է աշխատաշուկայում մրցունակ դառնալուն, Հայաստանում լրագրողական դաշտի հետ կապերի հաստատմանը, մասնագիտական կարողությունների զարգացմանը։
Արցախցի մեդիաներկայացուցիչների մասնագիտական հմտությունների զարգացմանն ուղղված ծրագիրն իրականացվել է 2023 թ.-ի նոյեմբերից մինչև 2024 թ.-ի մարտը: Ծրագրի առաջին փուլում իրականացվել են տեղեկատվության ազատություն և անձնական տվյալների պաշտպանություն, փաստերի ստուգման, տեղեկատվության ճշգրտությունը ստուգելու, կեղծ լուրերը բացահայտելու հմտությունների զարգացման, բաց տվյալների և աղբյուրների վերլուծության թեմաներով եռօրյա դասընթացներ:
Ծրագրի երկրորդ փուլում ծրագրի մասնակից Արցախցի լրագրողները պատրաստել են մուլտիմեդիա հոդվածներ Արցախի հիմնահարցերի, արցախահության խնդիրների վերաբերյալ, որոնք հրապարակվել ԻԱԿ-ի պաշտոնական կայքում և սոցիալական էջում, ինչպես նաև վերահրապարակվել են հայաստանյան մյուս զլմներում:
Ծրագրի շրջանակում լրագրողները մասնակցել են հարցումների, որոնցով գնահատել են ծրագիրը և դրա ունեցած ազդեցությունը մասնագիտական աշխատանքում։ Այսպես՝ բոլոր մասնակիցները ծրագրից եղել են գոհ, նրանց կարծիքով՝ դասընթացը բարելավել է մասնագիտական կարողությունները:
Մասնագիտական պրակտիկայում դասընթացի ունեցած ազդեցությունը գնահատող հարցմանը 20 լրագրողից մասնակցել է 14-ը։ Հարցման բոլոր մասնակիցները կարծում են, որ ծրագիրը հնարավորություն է տվել ձեռք բերելու այնպիսի հմտություններ և գիտելիք, որոնց շնորհիվ կարողանում են աչքի ընկնել մեդիաոլորտում, նպաստել է այլ լրագրողների հետ կապերի ամրապնդմանը և սկսել են ավելի լավ պատկերացնել հայկական մեդիադաշտը: 92,86%-ի գնահատմամբ՝ այն մրցունակ է դարձրել աշխատաշուկայում, իսկ 85,72%-ը փոխանցված գիտելիքն օգտագործում է մասնագիտական պրակտիկայում։
Հարցվածների 71,43%-ը նշել է, որ ծրագրին մասնակցելուց հետո փոխել է գործելակերպը բաց աղբյուրների օգտագործման, տեղեկություններն ավելի արագ և հեշտ որոնելու, մուլտիմեդիա նյութեր ստեղծելու, վերլուծություններ կատարելու տեսանկյունից։
Արցախցի լրագրողները նաև նշել են, որ ծրագիրը դրականորեն ազդել է Հայաստանում ինտեգրվելուն, իսկ 85,72%-ը կարծում է, որ դասընթացների շնորհիվ հեշտացել է Հայաստանի լրատվամիջոցների և լրագրողների հետ կապեր հաստատատելը, ավելին՝ 64,29%-ի համար ծրագիրը եղել է աշխատանք գտնելու լավ հնարավորություն։
Ստորև ներկայացված է ծրագրի «Ժամանակագրությունը», ինչպես նաև ծրագրի շրջանակում կազմակերպված դասընթացների ու լրագրողների պատրաստած մուլտիմեդիա նյութերի հղումները։
«Բաց տվյալների վերլուծություն և բաց աղբյուրների օգտագործում» թեմայով դասընթաց
«Անձնական տվյալների պաշտպանություն և տեղեկատվության ազատություն» թեմայով դասընթաց
