Մամուլի ազատության համաշխարհային օրվա առթիվ Նկարիչների միությունում բացվեց “Մամուլի ազատություն. տեղեկատվություն ստանալու իրավունք” խորագրով լուսանկարչական ցուցահանդեսը, որի կազմակերպիչ Ինֆորմացիայի ազատության կենտրոնի տնօրեն Շուշան Դոյդոյանը “Մաքսլիբերթի”-ի հետ զրույցում ասաց, որ ներկայացված 300 լուսանկարներից ժյուրին ընտրել է 30-ը:
«Առաջին անգամ է այս թեմայով լուսանկարչական ցուցահանդես կազմակերպվում, եւ մասնակիցներն էլ ոչ միայն պրոֆեսիոնալ լուսանկարիչներ են, այլ նաեւ լրագրողներ, անգամ սովորական քաղաքացիներ, մենք որեւէ խտրականություն չենք դրել», – պատմեց Դոյդոյանը։
Ցուցահանդեսին ներկայացված ամենահին նկարը արված է 1988 թվականին: Շուշան Դոյդոյանն ասաց, որ լուսանկարների մի մասը փաստագրական են, իսկ մյուս մասը` բեմադրված:
Մամուլի ազատությանը նվիրված այս ցուցահանդեսը բաց կլինի եւս մեկ շաբաթ, մուտքն ազատ է: Ցուցադրված լուսանկարները կտպագրվեն նաեւ կատալոգում եւ անվճար կբաժանվեն:
Աղբյուրը` www.azatutyun.am
