Կառավարության նիստում այս նախագիծը դեռ չի քննարկվել, սակայն դժգոհության ալիքն արդեն բարձրանում է։ Հասարակական եւ լրագրողական կազմակերպություններն ընդդիմանում են «Տեղեկատվության ազատության մասին» օրենքի նոր նախագծի մշակման գործընթացից:

Պատճառն այն է, որ նախ պաշտոնական որեւէ վերջնական նախագիծ չի ներկայացվում, երկրորդ՝ չկա աշխատանքային խումբ, քննարկումների միջավայր, որտեղ հաշվի կառնվեն շահագրգիռ կողմերի կարծիքներն ու առաջարկությունները: Ինֆորմացիայի ազատության կենտրոնի նախաձեռնությամբ՝ այս խնդրահարույց հարցի քննարկմանն այսօր մասնակցել են լրագրողներ, հասարակական կազմակերպությունների ներկայացուցիչներ, գերատեսչությունների հասարակայնության հետ կապերի պատասխանատուներ:

Քննարկման մասնակիցները նշել են, որ գործող օրենքը որոշակի բացթողումներ ուներ, բայց առաջարկվող փոփոխությունները շատ ավելի խոցելի են դարձնում այն:

Քննարկման ավարտին մասնակիցները համաձայնության են եկել ընդհանուր հայտարարության տեքստի շուրջ, որով Արդարադատության նախարարությունից պահանջում են օրենքի հետ կապված որեւէ փոփոխություն չձեռնարկել եւ այս պահին ընթացքի մեջ գտնվող գործընթացը զրոյացնել:

Աղբյուրը՝ yerkirmedia.am