Ինֆորմացիայի ազատության կենտրոնը 2014 թ.-ի ապրիլի 3-ին տեղեկություն ստանալու գրավոր հարցմամբ դիմել էր Վ. Բրյուսովի անվան լեզվահասարակագիտական համալսարանին` խնդրելով հայտնել, թե իրավագիտություն և իրավագիտության ոլորտի առարկաներ (իրավունքի տարբեր ճյուղեր, իրավունքի պատմություն, իրավունքի տեսություն, դատավարական իրավունք և այլն) դասավանդող քանի դասախոս (ներառյալ՝ սեմինարավարները) ունի լեզվաբանական համալսարանը, ինչպես նաեւ հայտնել, թե լեզվաբանական համալսարանում իրավագիտություն և իրավագիտության ոլորտի առարկաներ դասավանդող դասախոսներից (ներառյալ` սեմինարավարները) քանիսն են փաստաբան։
Համալսարանից պատասխան չստանալով` 2014 թ.-ի հունիսի 6-ին Ինֆորմացիայի ազատության կենտրոնը դիմել է ՀՀ վարչական դատարան` ընդդեմ Վ. Բրյուսովի անվան լեզվահասարակագիտական համալսարանի` խնդրելով ճանաչել ԻԱԿ-ի` տեղեկատվության ազատության ևողջամիտ ժամկետում պատշաճ պատասխան ստանալու իրավունքների խախտման փաստը և պարտավորեցնել համալսարանին տրամադրել ԻԱԿ-ի` տեղեկություն ստանալու գրավոր հարցմամբ պահանջված տեղեկությունները:
Այն բանից հետո, երբ ԻԱԿ-ը հայց էր ներկայացրել դատարան` 2014 թ.-ի հունիսի 10 թվագրված գրությամբ համալսարանը տրամադրեց ԻԱԿ-ի պահանջած տեղեկությունները: Հաշվի առնելով այն, որ համալսարանը տրամադրել էր սպառիչ տեղեկատվություն, ինչպես նաեւ տեղեկատվության տրամադրումն ուշացնելու վերաբերյալ համալսարանի պատճառաբանությունները` ԻԱԿ-ը հրաժարվեց նախկին հայցապահանջներից, դատական գործը կարճվեց:
