2011 թ.-ի փետրվարի 7-ին ԻԱԿ-ը գրավոր հարցմամբ դիմել էր ՀՀ Արտակարգ իրավիճակների նախարարությանը` խնդրելով հայտնել, թե կա՞ն արդյոք նախարարության տնօրինության տակ փաստաթղթեր, որոնք գաղտնազերծվել են 2010 թ.-ին, եւ եթե կան, ապա խնդրել էր տրամադրել այդ փաստաթղթերի պատճենները:
ՀՀ ԱԻ նախարարությունը հղում էր արել ՀՀ Հատուկ քննչական ծառայությանը` նշելով, որ այդ փաստաթղթերն առգրավվել են ՀՀ ՀՔԾ-ի կողմից: ՀՀ Հատուկ քննչական ծառայությունը, սակայն, ԻԱԿ-ին տեղեկացրել է, որ առգրավված փաստաթղթերի պատճեններն առկա են ԱԻ նախարարությունում: Այսինքն, տեղեկատվություն տնօրինողը ՀՀ արտակարգ իրավիճակների նախարարությունն է: Ուստի 29.03.2011 թ.-ին ԻԱԿ-ը կրկին դիմել էր նախարարությանը, սակայն ԱԻՆ-ը անպատասխան էր թողել գաղտնազերծված փաստաթղթերի պատճենները տրամադրելու մասին ԻԱԿ-ի հարցումը: ԱԻՆ-ը անպատասխան էր թողել նաեւ ԻԱԿ-ի` 25.05.2011 թ.-ի եւ 20.10.2011 թ.-ի հարցումները:
Արդյունքում, ԻԱԿ-ը 2011 թ. նոյեմբերի 8-ին դիմել էր ՀՀ վարչական դատարան՝ պահանջելով պարտավորեցնել ՀՀ Արտակարգ իրավիճակների նախարարությանը հնգօրյա ժամկետում տրամադրել հայցվող տեղեկատվությունը, ինչպես նաեւ ՀՀ ԱԻ նախարար Արմեն Երիցյանին ենթարկել վարչական պատասխանատվության 50.000 ՀՀ դրամի չափով:
Մայիսի 21-ին կայացավ ԻԱԿ-ն ընդդեմ ՀՀ Արտակարգ իրավիճակների նախարարության դատական նախնական նիստը, որի ժամանակ ԱԻ նախարարությունը տրամադրեց ԻԱԿ-ի պահանջած ողջ տեղեկատվությունը` 51 էջից բաղկացած, ինչի արդյունքում էլ կնքվեց հաշտության համաձայնություն ԻԱԿ-ի եւ ՀՀ Արտակարգ իրավիճակների նախարարության միջեւ:
ՀՀ Արտակարգ իրավիճակների նախարարության տրամադրած տեղեկություններին կարող եք ծանոթանալ այստեղ:
ԻԱԿ-ի՝ 2011 թ. նոյեմբերի 8-ին ՀՀ վարչական դատարան ներկայացված այցադիմումին կարող եք ծանոթանալ այստեղ:
Հաշտության համաձայնությանը կարող եք ծանոթանալ այստեղ:
