Ինֆորմացիայի ազատության կենտրոնը 2008 թ. օգոստոսի 1-ին տեղեկատվություն ստանալու հարցում է ուղարկել Նոր Նորքի թաղային համայնքին` խնդրելով տրամադրել հետեւյալ տեղեկությունները.
- Նոր Նորք համայնքին սեփականության իրավունքով քանի՞ բնակարան է պատկանում (այդ թվում համայնքի հաշվեկշռում քանի՞ բնակարան է գրանցված), որոնցում բնակվում են այն բնակիչները, որոնք չեն սեփականաշնորհել իրենց բնակարանները:
- Խնդրում ենք հայտնել այդ բնակարանների հասցեները:
- Նոր Նորքի թաղապետարանը քանի՞ հայց է հարուցել սեփականության իրավունքով համայնքին պատկանող վերը նշված բնակարաններից բնակիչներին վտարելու պահանջով:
- Խնդրում ենք, ներկայացնել այդ դատական գործերի ելքի մասին տեղեկատվություն (քանի՞սն է բավարարվել, քանի՞սը` մերժվել):
12.08.2008 թ. գրությամբ Նոր Նորքի թաղապետարանը տեղեկացրել է, որ «նշված ժամկետում չենք կարող Ձեզ տրամադրել անհրաժեշտ տեղեկությունները, քանի որ համայնքի ղեկավարի համապատասխան կարգադրությունով կատարվում է համայնքի վարչական տարածքում գտնվող համայնքային սեփականություն հանդիսացող բնակելի եւ ոչ բնակելի տարածքների փաստացի չափագրում եւ գույքագրում»:
ԻԱԿ-ը լիարժեք եւ սպառիչ պատասխան ստանալու համար սպասեց օրենքով սահմանված 30-օրյա ժամկետի լրանալուն, սակայն այդ ժամկետը լրանալուց հետո էլ պատասխան չստանալով` 2008 թ. հոկտեմբերի 9-ին ՀՀ վարչական դատարան հայց ներկայացրեց` ընդդեմ Նոր Նորքի թաղապետարանի եւ Նոր Նորքի թաղային համայնքի ղեկավար Դավիթ Պետրոսյանի` թաղապետարանի անգործությունը ոչ իրավաչափ ճանաչելու, վերջինիս հնգօրյա ժամկետում տեղեկատվություն տրամադրելուն պարտավորեցնելու եւ Նոր Նորքի թաղային համայնքի ղեկավար Դավիթ Պետրոսյանին 50.000 դրամ տուգանքի չափով վարչական պատասխանատվության ենթարկելու պահանջների մասին:
2009 թ. մարտի 23-ին ՀՀ վարչական դատարանը (նախագահող դատավոր` Աշոտ Սարգսյան) մասնակի բավարարեց ԻԱԿ-ի հայցը` Նոր Նորքի թաղապետարանի անգործությունը ոչ իրավաչափ ճանաչելու պահանջի մասով:
Դատարանը վճռեց ոչ իրավաչափ ճանաչել ԻԱԿ-ի կողմից հայցվող տեղեկատվության տրամադրման մերժելուն ուղղված Նոր Նորքի ղեկավարի գործողությունները եւ Նոր Նորքի համայնքից հօգուտ ԻԱԿ-ի բռնագանձել 4.000 դրամ` որպես պետական տուրքի գումար:
Դատարանը մերժեց հայցը` Նոր Նորքի թաղապետարանին հնգօրյա ժամկետում տեղեկատվություն տրամադրելուն պարտավորեցնելու մասով, քանի որ մինչ վճռի հրապարակումը Նոր Նորքի թաղապետարանն արդեն պատասխանել էր ԻԱԿ-ի հարցմանը: Դատարանը նաեւ մերժեց հայցը` Նոր Նորքի թաղային համայնքի ղեկավար Դավիթ Պետրոսյանին 50.000 դրամ տուգանքի չափով վարչական պատասխանատվության ենթարկելու պահանջի մասով:
ԻԱԿ-ը վճիռը բողոքարկեց վճռաբեկության կարգով` ՏԻՄ ղեկավարներին վարչական պատասխանատվության ենթարկելու օրենսդրության պահանջը` տուգանքը, ի վերջո, կիրառելու պահանջով: Սակայն ՀՀ Վճռաբեկ դատարանը գտավ, որ վարչական դատարանի կայացրած վճիռը հիմնավոր է եւ ենթակա չէ բեկանման:
