Երեկ ՀՀ վարչական դատարանում, դատավոր Աշոտ Սարգսյանի նախագահությամբ ընթացող նախնական դատական նիստին էին ներկայացել հայցվոր, Ինֆորմացիայի ազատության կենտրոնի (ԻԱԿ) պատասխանատու Շուշան Դոյդոյանն ու պատասխանող, Դավիթաշենի թաղապետարանի ներկայացուցիչ Մարինե Խաչիկյանը:  ԻԱԿ-ը դեռ անցյալ տարվա հուլիսի 30-ին հարցում էր ներկայացրել Դավիթաշենի թաղային համայնքին՝ խնդրելով իրենց տրամադրել մի քանի տեղեկություն: Մասնավորապես, Դավիթաշեն համայնքում սեփականության իրավունքով քանի՞ բնակարան է պատկանում այն քաղաքացիներին, որոնք դեռ չեն սեփականաշնորհել իրենց բնակարանները, թաղապետարանը քանի՞ հայց է հարուցել վերոնշյալ բնակարաններից բնակիչներին վտարելու համար, հաշվի առնելով այն հանգամանքը, որ տվյալ բնակարանները սեփականության իրավունքով պատկանում են համայնքին: ԻԱԿ-ը խնդրել էր նաեւ, տեղեկատվության ազատության մասին գործող օրենքի համաձայն, տրամադրել դատական ելքերի մասին տեղեկատվությունը նույնպես, նշելով բնակարանների հասցեները: Թաղապետարանը հրաժարվել էր այն տրամադրել: ԻԱԿ-ի հայցապահանջներից մեկն էր՝ 50 000 դրամի չափով վարչական պատասխանատվության՝ տուգանքի ենթարկել թաղային համայնքի ղեկավար Արթուր Գեւորգյանին: Երեկ Ինֆորմացիայի ազատության կենտրոնն անսպասելի հրաժարվեց իր հայցապահանջներից, դատարանում հայտնելով, որ թաղային համայնքի ղեկավարը պարտավորվել է 1 ամսվա ընթացքում իրենց տրամադրել վերոնշյալ տեղեկատվությունը: Վարչական դատարանը, առաջնորդվելով 90 հոդվածով, այն է՝ «Ցանկացած փուլում գործը կարճվում է, եթե հայցվորը հրաժարվում է», կարճեց գործի վարույթը: Կողմերին 20 րոպե հետո տրամադրվեց կարճման մասին դատարանի կայացրած որոշումը: ՌՈՒԶԱՆ ՄԻՆԱՍՅԱՆ “Առավոտ” օ/թ