Փետրվարի 9-ին «Մեդիա կենտրոնում» տեղի ունեցավ քննարկում «ՀՀ կառավարության դռնփակ նիստեր. ժողովրդավարության հետքա՞յլ, թե՞ արդյունավետ աշխատելաոճ» թեմայով:
ՀՀ արդարադատության նախարարության ներկայացրած «Կառավարության կառուցվածքի և գործունեության մասին» օրենքի նախագիծով նախատեսվում է, որ Կառավարության նիստերը պետք է անցկացվեն դռնփակ ռեժիմով: ՀՀ արդարադատության նախարար Դավիթ Հարությունյանը սույն նախաձեռնությունը հիմնավորում է` ելնելով միջազգային փորձից և կառավարության նիստերն առավել արդյունավետ, անկաշկանդ ու բովանդակային քննարկումների մթնոլորտում անցկացնելու անհրաժեշտությունից: Իշխող Հանրապետական կուսակցության ներկայացուցիչները չեն համարում, որ սա հետքայլ է ժողովրդավարությունից և հավաստիացնում են, որ գործադիր իշխանության գործունեության թափանցիկությունը չի տուժելու:
Քաղաքացիական հասարակության ու լրագրողական համայնքի ներկայացուցիչները ընդհակառակը` մտավախություն ունեն, որ այս փոփոխությունը էականորեն նվազեցնելու է պետական իշխանության ամենակարևոր մարմնի աշխատանքի թափանցիկության աստիճանը և նախաձեռնությունը համարում են տեղեկատվության ազատության դեմ ոտնձգություն:
Բանախոսներն էին՝
Բորիս Նավասարդյան, Երևանի Մամուլի ակումբի նախագահ
Շուշան Դոյդոյան, Ինֆորմացիայի ազատության կենտրոնի հիմնադիր նախագահ
Աշոտ Մելիքյան, Խոսքի ազատության պաշտպանության կոմիտեի նախագահ
